Naša dźěławosć

Po druhej swětowej wójnje bu „pěstowarnja w Malešecach“ prěni raz w chronice wjeski Malešec naspomnjena. Wot tutoho časa sem wopytuja dźěći pěstowarnju. Po měrniwej rewoluciji w NDR bě pěstowarnja w nošerstwje gmejny a w lěće 2000 přewza SŠT z.t. nošerstwo.

Witaj-pěstowarnju nańdźeš w starym knježim domje, w kotrymž je tež gmejnski zarjad zaměstnjeny. Dom wobdawaja lěsy, łuki a haty z wjele pólnymi pućikami, kiž wjedu k susodnym wjeskam. Městnosć a zahroda při pěstowarni z wjele štomami a kerkami skićitej dźěćom móžnosć, so hrajkajo z přirodu rozestajeć. Nastroje w zahrodźe a wokoło domu pohonjeja k wuwiću wšitkich zmysłow dźěsća a ke kreatiwnej hrě a pohibej.

Rumnosće, we wotměnjacych pisanych barbach su do wšelakich róžkow rozdźělene. Tam smědźa sej dźěći swój kut za zaběru, hrajkanje, kreatiwnosć, twarjenje abo wotpočnjenje wupytać. Hrajki a hry su wšěm dźěćom přistupne.

Dźěći, kiž přińdu do pěstowarnje, serbsce njerěča. Wot žłobika sem wone bjez předznajomosćow serbsku rěč starobje wotpowědujo nawuknu.

Serbske nałožki a tradicije kaž tež wjerški cyrkwinskeho lěta so zhromadnje z dźěćimi a z wulkej podpěru staršich swjeća a haja. Za wjesne swjedźenje so krótke programy z dźěćimi nazwučuja. Staršim wobydlerjam wsy zanjesu dźěći serbske spěwčki a basnje k narodninam. Domowinska skupina sej dźěći kóždolětnje na swoju hodowničku přeprošuje. Tak so dobry poćah k wjesnjanam njezhubi. K swjedźenjam so dźěći rady serbsku ewangelsku narodnu drastu wobleku a přeproša sej hosći na program.

W projektach rozestajeja so dźěći zhromadnje z kubłarkami přez dlěši čas intensiwnje a zaměrnje z jednej temu ze žiwjenskeho wobswěta dźěsća. We wšelakorych zaběrach so wšě zmysły dźěsća narěča. Zaběra a rozestajenje z tematiku stej při tym wažnišej hač docpěće rezultatow. Wosebje projekt wo serbskich powěsćowych figurach je dźěći, kubłarki a staršich přez dlěši čas zaběrał a přewodźał. Z tutoho projekta narosće ideja, pěstowarni a skupinam mjeno dać. Tak rěka wot lěta 2009 pěstowarnja „K wódnemu mužej”, a skupiny su lutki, wódne mužiki, błudnički a zmije.

Kubłarki dźiwaja na strowe zežiwjenje w pěstowarni. Kóždy dźeń so dźěćom sad, zelenina a wšelake nopoje poskićeja. Čaj je dźěćom cyły dźeń přistupny.

Srjedźnej a předšulskej skupinje poskića so zažne hudźbne kubłanje a joga. Jónu wob tydźeń du pěstowarske dźěći do sportoweje hale sportować. Hortowe dźěći so w pěstowarni po šuli a w prózdninach derje čuja.