Naš wodźacy wobraz
Prajimy kóždemu dźěsću a kóždej swójbje „Witajće k nam”.
Smy wotewrjeni a nimamy předsudki. Tak čuje so kóžde dźěćo w našim zarjadnišću derje a wěste.
Widźimy dźěćo jako jónkrótnu, samostatnu wosobinu, kotruž ze wšěmi swojimi sylnosćemi a słabosćemi přiwzamy a akceptujemy.
Dźěćo ze wšěmi swojimi požadosćemi steji w srjedźišću a my jako kubłarki přewodźamy a podpěramy je při swojim wosobinskim wuwiću. Při tym damy dźěsću čas, kotryž za swoje wuwiće trjeba.
Dźěćo ma prawo, swójske nazhonjenja činić a ze zmylkow wuknyć.
Zajimy, zamóžnosće a kmanosće dźěći so wot nas pedagogow spóznaja a wotpowědnje so zhromadnje poskitki a aktiwity planuja a přewjeduja.
Sylnimy sebjewědomje a samostatnosć dźěći z tym, zo jim dowolimy tak wjele kaž móžno samym wuspytać, zo bychu tak swójske nazhonjenja činili a puće k rozrisanju namakali.
Dokelž je hra zakładna žiwjenska a wuknjenska forma dźěći, so na to wosebje dźiwa.
Wosebitosće
W pěstowarni dźěła so po metodźe imersije, to rěka, zo so ze wšěmi dźěćimi cyły dźeń serbsce rěči. Zwjetša pochadźeja dźěći z němskich abo rěčnje měšanych staršiskich domow abo tajkich, w kotrychž je so serbska maćeršćina hižo pozhubiła. Přez wšědne nałožowanje serbšćiny dźěći spěšnje nowu rěč rozumja a pozdźišo tež rěča.
Křesćanske žiwjenje kaž tež swjećenje cyrkwinskich swjatych dnjow stej bytostny wobstatk pěstowarskeho lěta. Wažnu rólu hraje hajenje serbskich nałožkow a tradicijow w běhu lěta. Tute dźěći a kubłarki z wjele wjeselom a lubosću přihotuja a swjeća. K wosebitym přiležnosćam wobleku so dźěći regionalnu narodnu drastu.
Na strowe zežiwjenje so w přebywanišću dźiwa a w prawidłownych wotstawkach so wotpowědne projekty přewjedu.
Tydźensce so předšulskim dźěćom sportowanje pod nawodom sportoweho wučerja we sportowej hali poskićuje. Dwutydźensce poskićene joga so wot dźěći jara rady přiwozmje. Kóždy druhi pjatk zetkawa so skupina pjerachow. Tu maja starši ze swojimi dźěćimi wot 6 měsacow sem, kotrež hišće do našeho žłobika njechodźa móžnosć, team a pěstowarnju zeznać.
Dźěło ze staršimi
Zo bychmy poradźene kubłanske partnerstwo tworili, je trjeba mjez Wami jako staršimi a nami jako pedagogojo dowěrliwe a so mjez sobu česćace nastajenje. Akceptujemy a respektujemy Was a dźeržimy so dialogiskeho zakładneho nastajenja Wam napřećo. Tak zhonimy we wosobinskich rozmołwach a w rozmołwach „při durjach“ wo aktualnych žiwjenskich situacijach, podawkach a změnach we Wašej swójbje a z tym zwisowace zadźerženje Wašich dźěći a móžemy wotpowědnje reagować a Was podpěrać.
Na spočatku pěstowarskeho lěta přewjedujemy staršisku zhromadźiznu.
Staršiska přirada, kotraž so kóždej dwě lěće woli, funguje jako móst mjez našim zarjadnišćom a staršimi. Wona posrědkuje při prašenjach a problemach mjez staršimi a zarjadnišćom a podpěruje pěstowarnju při zarjadowanjach a wšelakich projektach.
