Dźěło ze seniorami

Seniorojo tworja swójski wuběrk SŠT. Ćežišća jich dźěła su:

  • Kubłanske jězby

    Kóždolětne kubłanske jězby su jara prašane. Wobdźělnicy wopytaja historiske městna skutkowanja serbskich wosobinow w tu- a wukraju.
  • Dnjowe jězby
    słuža předewšěm zeznaću Hornjeje a Delnjeje Łužicy.
  • Posudźowanje wukonow
    wosebje při wubědźowanjach serbskeje rěče wosmych do dźesatych lětnikow
  • Lektorske přidźěła
    předewšěm za wučbne a wuknjenske materialije
  • Wučerjo serbšćiny
    za staršich, kiž maja Witaj-dźěći resp. za šulerjow – přidružnikow koncepta 2plus (šulerjo bjez znajomnosćow serbšćiny)

 

„Pólska – Šleska - Karpacz“

Kubłanska wuprawa Serbskeho šulskeho towarstwa z.t. 2025
wot njedźele 07.05. do štwórtka 11.05.2023
Lubi čłonojo SŠT a dalši zajimcy,
dźensa Was wutrobnje přeprošujemy na našu wjacednjowsku jězbu přez
„Smoliny / Harz“ a wokolinu. Nadźijamy so, zo smy za Was zajimawy program přihotowali.
njedźelu, 07.05.2023
Wotjězd z busom je w 7.00 hodź. z A.-Bebloweho-naměsta w Budyšinje. Zwonkabydlacy dóstanu 
informaciju k wotjězdej. Pojědźemy po awtodróze přez Lipsk, Halle a pozastanjemy w Klóštrje
Michaelstein. Potom dojědźemy sebi do našeho hotela w Blankenburgu. 
Tu mamy w hotelu „Fürstenhof“ štyri přenocowanja ze snědanju a wječerju skazane.
(www.kurhotel-fuerstenhof.de)
póndźelu, 08.05.2023
Po snědani pojědźemy do Wöltingerode – smy přeprošeni na wjedźenje w tamnišej palerni a woptaće 
wšelakich družin spirituozow. Wot załoženja klóšterskeje palernje w lěće 1682 je Klóšter 
Wöltingerode znaty za swoje nadobne spirituozy.
Po tym podamy so do Goslara - tam móže sebi kóždy woměrje zakusk słodźeć dać a po tym wjedźe 
nas wodźerka po měsće hač k Kaiserpfalzy. Mała kołojězba přez zapadnu „Smolinu“ nimo Torfhaus z
wuhladom na Brocken so na wróćopuću k hotelej přizamknje.
wutoru, 09.05.2023
Po snědani pojědźemy do Wernigerode - pisane město w Smolinach. Tam wobhladamy sebi sławny 
hród a radnicu. Z našej wjedźerku změjemy wjedźenje po měsće.
Wróćojězba wjedźe nas přez Elend, směr Stieg k tamnišej Stabskej cyrkwi.
Wottam dźe zaso wróćo k hotelej.
srjedu, 10.05.2023
Po snědani podamy so do Halberstadta na wjedźenje po měsće a wodźenje po Tachantskej cyrkwi z
pokładom. Popołdnju wobhladamy sebi z našej wjedźerku město Quedlinburg.
Wróćo k hotelej jědźemy podłu sławneje a husto w filmach widźaneje Čertoweje murje.
štwórtk, 11.05.2023
Wotjězd wot hotela po snědani na směr Rappbodetalowu zawěru k najdlěšemu wisatemu mostej 
swěta (483 m dołhi a 118 tonow ćežki). Pućowar maršěruje na mosće w něhdźe 100 metrach 
wysokosće po krajinje.
Za tych, kiž dyrbja strowotnych přičin dla swój wozyčk sobu wzać, njebudu problemy.
Zo bychmy jězbu přewjesć móhli, je 25 wobdźělnikow trěbnych.
Wuprawa płaći za jednotliwca 540,00 € (dwułožowa stwa)
630,00 € (jednowosobowa stwa)
Płaćizna wobsahuje: jězbu z busom a wšitke wulěty
přenocowanje w hotelu a połpensija
wodźenja w Klóštrje Michaelstein, Wöltingerode, Goslar,
Wernigerode, Quedlinburg, Tachantska cyrkej w Halberstadt,
zastup žurle Kaiserpfalz w Goslaru
přewod přez Serbske šulske towarstwo
Prosymy zajimcow, so hač do 28.02.2023 přizjewić.
tel.-čo. 03591 550 209 (knjeni Deleńkowa)
e-mail: m.delenk@sorbischer-schulverein.de
Za wuprawu přepokazajće prošu sumu hač do 06.04.2023 na konto SŠT.
IBAN DE 80 8707 0024 0619 8600 00
BIC DEUTDEDBCHE
Deutsche Bank
přispomnjenje: „Smoliny“
Z přećelnym postrowom
Serbske šulske towarstwo z. t.


wot štwórtka 08.05.2025 do póndźele 12.05.2025

Lubi čłonojo, přećeljo a dalši zajimcy SŠT,

přeprošujemy Was wutrobnje  na našu wjacednjowsku jězbu po Šleskej, do Karpacza a wokoliny. Nadźijamy so, zo smy za Was zajimawy program přihotowali. Z knjeni Deleńkowej smy so dojednali, zo jězby za naše towarstwo tež jako wuměnkarka dale po zwučenym wašnju přewodźa.

štwórtk, 08.05.2025
Wotjědźemy z Cordulu a jeje busom w 8.00 hodź. z A.-Bebloweho-naměsta w Budyšinje. Zwonkabydlacy dóstanu informaciju k wotjězdej. Pojědźemy po awtodróze na směr Zhorjelc do Karpacza. Tu mamy w hotelu ****„Gołebiewski“ štyri přenocowanja ze snědanju a wječerju skazane. (www.golebiewski.pl)

Hižo po puću zetkamy so z našim wjedźerjom a pozastanjemy w Jelenej Górje. 

Dale wobhladamy sebi tykowanu cyrkej Swj. Trojicy w Świdnicy a pozastanjemy w Mjezynarodnym dokumentaciskim centrumje w Krzyźowje (Kreisau). 

pjatk, 09.05.2025
Po snědani pojědźemy z našim přewodźerjom na směr Špindlerowy młyn a podamy so z liftom na Sněžku (1603 m). Nawječor wróćimy so do hotela.

sobotu, 10.05.2025
Po snědani pojědźemy do městačka Polanica Zdrój (Bad Altheide) a wobhladamy sebi sanatorij a kurowy park. Dale pozastanjemy při kapałce w Bad Kudowa-Zdrój / Czermna (Grenzeck). We 18. lětstotku su so smjertne powostanki woporow móra a wójnow tu składowali. 

Dale změjemy móžnosć, sebi „Šleski Jeruzalem“ we Wambierzycach (Albendorf) wobhladać. Cyrkej bu 1263 natwarjena a je najwoblubowaniša putniska cyrkej Šleskeje. Wosebitostka su mjez druhim 33 kamjentnych schodow na šěrokosći 50 m – kotrež Jězusowu starobu symbolizuja. 

njedźelu, 11.05.2025
Po snědani podamy so do parka miniaturow Kowary / Schmiedeberg. Směće być wćipni na parlički Šleskeje architektury w formaće 1 : 25. Twary prezentuja so we wulkej fabrikskej hali a pod hołym njebjom. Hižo z lěta 2003 witaja tam kóždolětnje tójšto wopytowarjow.

Dale wjeselimy so na wopyt domu spisowaćela Gerharta Hauptmana.

Wón narodźi so 1862 w Šleskej a zemrě 1946. Jemu spožći so w lěće 1912 Nobelowe myto za literaturu. Hakle 2022 je so wšelaka wosobinska nadoba z wobsydstwa spisowaćela zaso do muzeja nawróćiła.  

Hdyž smy w Karpaczu – potom sebi tež znatu cyrkej Wang wobhladamy.

póndźelu, 12.05.2025
Po snědani w hotelu podamy so na dompuć. W Lubiju smy přeprošeni na wopyt sławneje firmy Augusta Förstera. Při wjedźenju móžemy so z dźěłom klawěrotwarcow zeznajomnić.  

Zo bychmy jězbu přewjesć móhli je 25 wobdźělnikow trěbnych.

Wuprawa płaći za jednotliwca
550,00 €* (dwułožowa stwa) 
690,00 €* (jednowosobowa stwa)

*Štóž je so 2024 na jězbje do Augsburga a do Bolesławieca wobdźělił, zapłaći 50,00 € na wosobu mjenje.  (500,00 € / 640,00 €)

Płaćizna wobsahuje:
• jězbu z busom a wšitke wulěty
• přenocowanje w hotelu a połpensija
• přewod přez Serbske šulske towarstwo
• organizatoriske změny su móžne

Prosymy zajimcow, so hač do 14.02.2025 přizjewić.

tel: 03591 / 550 209
e-mail: m.delenk@sorbischer-schulverein.de

Za wuprawu přepokazajće prošu sumu hač do 15.04.2025 na konto SŠT.

Z přećelnym postrowom
Serbske šulske towarstwo z. t.

-
Serbske šulske towarstwo z.t
Rěčne wersije: hornjoserbsce | dolnoserbski | deutsch